Magkakaroon ng pansamantalang pagbabago sa mga bus stop at dispatching area ng Route 2 ng Q City Bus sa Lunes, July 27, dahil sa isasagawang State of the Nation Address o SONA ni Pangulong Ferdinand Marcos Jr.
Sa inilabas na abiso ng Quezon City Government, pansamantala munang hindi dadaanan ang Northbound St. Peter Bus Stop at ang Northbound at Southbound bus stop sa Maclang General Hospital.
Samantala, bubuksan naman ang Kalayaan C St. sa Commonwealth Avenue para sa northbound buses at Riverside St. sa Commonwealth Avenue para sa southbound buses bilang temporary bus stop.
Inilipat din pansamantala ang dispatching area ng Route 2 sa bahagi ng Commonwealth Avenue.
Pinapayuhan ang mga pasahero na planuhin nang maaga ang kanilang biyahe upang maiwasan ang abala habang ipinatutupad ang mga traffic at security measures para sa SONA.
