Nagpahayag ng suporta ang ilang pangunahing business organizations sa law enforcement agencies ng bansa kaugnay ng nagpapatuloy na imbestigasyon sa Philippine Sanjia Steel Corporation sa Tagoloan, Misamis Oriental na ipinasara matapos makitaan umano ng radioactive materials sa loob ng pasilidad.
Sa isang joint statement, sinabi ng mga grupo na dapat masusi, patas at nakabatay sa ebidensya ang imbestigasyon dahil hindi na lamang ito usapin ng labor at regulatory violations, kundi may kaugnayan na rin sa public safety, regulatory oversight at national security.
Ipinahayag din nila ang suporta kay Defense Secretary Gilberto Teodoro Jr. sa pagbibigay-diin sa umano'y panganib ng mga foreign networks na iligal na nag-ooperate malapit sa pasilidad ng Philippine Navy.
Nanawagan din ang mga ito na repasuhin ang mga safety standards at regulatory mechanisms para sa mga industriyang nasa mga sensitibo at istratehikong lugar.
Matatandaang iniuugnay ang Sanjia Steel sa Chinese businessman na si Tony Yang, na naaresto noong 2024 dahil sa umano'y pamemeke ng kanyang Filipino citizenship.
