Inanunsyo ng Department of Education (DepEd) na inaasahang makababalik na sa klase ang ilang paaralan sa Mindanao na apektado ng pagtama ng magnitude 7.8 na lindol.
Ayon sa DepEd, ang mga paaralan sa Cotabato, Kidapawan, Koronadal, Tacurong, at Sultan Kudarat ay nag-transition na sa “Hayo” phase sa ilalim ng Learning Continuity in Emergencies framework.
Dahil dito, napahihintulutan ang pagpapatuloy ng mga pag-aaral sa sandaling nakamit na ang mga safety conditions.
Samantala, ang mga paaralan naman sa General Santos City at Sarangani ay nananatili sa “Hinto” phase.
Ibig sabihin, pansamantala pa ring suspindido ang mga learning activities habang patuloy ang mga otoridad sa safety assessment, at naghihintay sa abiso ng mga lokal na pamahalaan.
Pagdidiin ni Education Secretary Sonny Angara, nais nilang makabalik ang mga bata sa pag-aaral, ngunit hindi maaaring madaliin ito lalo na kung hindi pa ligtas ang mga silid-aralan, at hindi pa handa ang mga guro at estudyante.
