NAGA CITY – Abala na naman ngayon ang mga personahe ng Task Force COMET o City Ordinances Monitoring, Enforcement, and Tracking ng Public Safety Office sa pagsita at pagkumpiska sa mga nagtitinda sa bangketa ng Naga City na ngayon ay lomolobo na naman dahil sa paparating na Pasko.
Ang aksyon na ito ng Task Force COMET ay mismong nakita ni Market Supt. Ramon Florendo ng Naga City Peoples Mall na kanya namang pinaburan dahil sa labag ito sa ordinansa hinggil sa sidewalks vending, na mahigpit na ipinagbabawal ang pagtinda sa tabi ng kalsada na isa sa dahilan ng trapiko sa sentro ng lungsod.
Sa panayam ng Brigada News FM Naga kay Florendo, sinabi niyang maraming lugar na silang iminungkahi sa mga vendors subalit matitigas aniya ang ulo ng mga ito kaya ang resulta ay problema, sa halip na makapag benta, hinuhuli at pinapamulta pa.
