Inihayag ni House Lead Prosecutor Gerville Luistro na posibleng lumampas pa sa Setyembre ang impeachment trial ni Vice President Sara Duterte.
Sa pulong balitaan sa Senado, binigyang-diin ni Luistro na kung pagbabasehan ang bilang ng witnesses at exhibits ng dalawang panig, maaaring hindi kayanin ang paglilitis ng hanggang Setyembre.
Subject aniya sa discretion ng Senate impeachment court ang bilang ng trial dates para sa prosecution at defense team.
Una rito, kinumpirma ni House prosecution legal spokesperson Atty. Benjamin Tolosa Jr. na animnapu’t dalawang trial dates ang hinihiling ng prosecutors habang tatlumpu naman sa defense.
Binigyang-diin din ni Tolosa na ilan sa mga testigo ng kampo ni VP Sara ay tinukoy lang sa opisina tulad ng representatives mula sa Office of the Vice President at Bureau of Internal Revenue.
Bukod dito, marami umano sa documentary evidence ng prosecution panel ay in-adopt ng defense.
Sinabi ng abogado na mayroong 248 common exhibits mula sa 276 exhibits ng prosekusyon ay kinopya umano sa pre-trial brief o inilista bilang ebidensya.
