Sa Liwasang Bonifacio sa Maynila ipagpapatuloy ng Iglesia ni Cristo (INC) ang kanilang rally ngayong Huwebes.
'Yan ay matapos bawiin ng Quezon City Department of Public Order and Safety (DPOS) ang kanilang permit para i-extend ang kanilang programa sa EDSA People Power Monument.
Sa liham ni QC DPOS Head Elmo San Diego sa INC, sinabi nitong binawi ang permit dahil sa matinding abalang idinulot ng rally sa mga motorista at iba pang dumaraan sa EDSA at White Plains Avenue.
Marami umano ang nahuli o hindi nakapasok sa trabaho at eskwela, habang naapektuhan din ang ilang negosyo.
Ayon pa sa Quezon City government, nilabag din umano ng mga nag-rally ang napagkasunduan na manatili lamang sa White Plains Avenue at huwag sakupin ang EDSA.
Binigyang-diin naman ng lokal na pamahalaan na iginagalang nito ang karapatan sa mapayapang pagtitipon, ngunit hindi anila ito dapat makasagabal sa kapakanan ng nakararami.
Tinapos ng INC ang kanilang programa sa EDSA nitong Miyerkules, dakong alas-8:00 ng gabi.
