Naghain ng show cause order (SCO) ang Land Transportation Office (LTO) matapos makita ang larawan ng isang rider ng motorsiklo na walang helmet, naka-tsinelas, at may suot na damit na may nakalagay sa likod na "Instructor."
Kinilala ang rider bilang instructor ng isang driving school sa isinagawang beripikasyon ng LTO dahil ito ay nagpapakita ng paglabag sa batas-trapiko.
Inatasan ng LTO na magpaliwanag at humarap ang may-ari ng motorsiklo at rider sa Intelligence and Investigation Division (IID) upang ipaglaban ang kanilang sarili at kung bakit hindi sila dapat hatulan ng kasong reckless driving, paglabag sa mandatory use of motorcycle helmets act, at pagbabawal sa pagsusuot ng tsinelas habang nagmamaneho ng motorsiklo.
Dagdag pa rito, kailangan din niya ipaliwanag ang naturang aksyon upang hindi madeklarang improper person to operate a motor vehicle ang kanyang driver’s license.
Samantala, isinailalim sa 90-araw na preventive suspension ang driver’s license ng instructor at inatasan siyang isuko ito sa IID.
Ang motorsiklo naman ay nasa alarm status na rin upang matiyak na hindi ito magagamit habang nagpapatuloy ang imbestigasyon.
