Naaresto na ng Manila Police District (MPD) ang isang lalaki na umano'y miyembro ng salisi gang na responsable sa serye ng nakawan sa Maynila.
Sa isinagawang Talk to the People ni Mayor Francisco "Isko" Moreno Domagoso, kinilala ang suspek na si Alvin Ibuenga, na mayroon umanong pitong naitalang kaso ng theft at isang kaso ng robbery.
Ayon sa pulisya, hindi residente ng Maynila si Ibuenga at kamakailan lamang itong dumating sa lungsod bago naaresto.
Sinabi rin ng MPD na nagsimula umano ang suspek sa paggawa ng krimen noong 15-anyos pa lamang ito.
Batay sa imbestigasyon, ginagamit ng grupo ang pagkakataong abala ang mga biktima sa pagkakarga o pagbaba ng mga gamit sa sasakyan.
Binubuksan umano ng mga suspek ang pinto ng driver's side at mabilis na tinatangay ang mga mahahalagang gamit bago tumakas.
Sa isa sa mga insidente, kamakailan tinangay umano ng mga suspek ang P30,000 cash, mga ID, at iba pang personal na gamit ng mga biktima.
Dahil sa tulong ng mga CCTV footage, natukoy at naaresto si Alvin Ibuenga.
Samantala, nananatili namang at large ang isa pa niyang kasabwat na kinilalang si Hercules de los Santos, o alyas "Herco," 21-anyos na lumabas na pamangkin pala ni Alvin.
Nanawagan ang pulisya sa suspek at sa kanyang pamilya na boluntaryo itong sumuko at harapin ang mga kasong isinampa laban sa kanya.
