CAMARINES SUR — Hindi na ngayon nakapagdiwang ng Araw ng mga Puso ang isang 41 taong gulang na lalaki sa Ragay, Camarines Sur matapos pagbabarilin ng hindi pa nakikilang salarin.
Sa inisyal na imbistigasyon ng Philippine National Police Ragay, nangyari ang insidente dakong alas cinco ng gabi kahapon sa Zone 2, Barangay GRS, halos 35 kilometro ang layo mula sa kasentruhan, habang nananatili sa isang kubo ang biktima na kinilalang si Geronimo Mondigo, residente ng Barangay Port Junction, matapos kumain sa bahay ng kaibigan.
Ayon pa kay Police Major Rayan Bagasala, ang Acting Chief of Police ng PNP Ragay, isang nakakapoteng lalaki ang nakitang responsable sa naturang krimen ngunit hindi pa tukoy ang pagkakakilalanlan nito matapos agad na tumakas.
Hindi naman inaalis ng hepe ang posibilidad na may kinalaman sa “Love Affair” ang motibo sa krimen ngunit isa lamang ito sa ilan pang nakikitang anggulo. Napag-alaman rin ng Brigada News FM Naga na dating drug personality ang biktima at nahuli na noon.
Sa ngayon, nagpapatuloy pa ang imbistigasyon ng PNP, habang nakaburol na ang labi ng biktima sa residensya nito sa Ragay.
