Patok ang pinakabagong suspense thriller na "What Lies Beneath," matapos nitong manguna sa listahan ng mga pinakapinapanood na TV series sa Netflix Philippines.
Nahook agad ang manonood sa pilot episode nang ipinasilip nito ang buhay ng magkakaibigang sina Alice, Mel, Erica, at Beth na nabago ang buhay dahil sa trahedyang kanilang sinapit 14 na taon ang nakalipas kung saan nasaksihan nila ang malagim na pagpatay sa kanilang kaibigang si Louisa.
Hindi pa roon natapos ang kanilang mapait na karanasan lalo pa at pinilit sila ng buong komunidad ng Amurao na ibintang ang krimen kay Edong (Jake Cuenca).
Unang episode pa lang ay trending at usap-usapan na online ang What Lies Beneath. Maraming netizen ang nagpahayag ng paghanga sa paraan ng pagkukwento ng serye, kung saan bawat eksena ay nagtutulak sa mga manonood na mag-isip at manghula.
Pinuri rin ng netizens ang maayos na pacing, mahusay na direksyon, at mahusay na casting, lalo na ang seamless transition ng nakaraan at kasalukuyan.
Lubos din pinuri ng manonood ang ipinakitang galing sa pag-arte ng bida na sina Janella Salvador, Sue Ramirez, Kaila Estrada, at Charlie Dizon, kasama ang kanilang younger counterparts na sina Eliza Borromeo, Reich Alim, Krystal Mejes, at Allyson McBride.
Sa pagpapatuloy ng serye, inaabangan ng mga manonood kung paano guguluhin ni Edong ang mga buhay ng Mabels at kung paano siya maghahanap ng hustisya sa mga kasinungalingang bumago sa kanilang lahat.
