Ikinalungkot ni dating Board Member Raul "Rolly" Rosal, kapatid ni Albay Governor Noel Rosal, ang naging resulta ng botohan sa Sangguniang Panlalawigan ng Albay para sa kanyang appointment bilang Albay Provincial Administrator.
Sa naging resulta ng botohan sa regular session ng 15th Sangguniang Panlalawigan, pito ang bumotong “No” at anim naman ang “Yes” para maging administrator si Rosal, kung saan inabot pa ng higit isang oras ang question hour ng mga board member at naging mainit din ang palitan ng sagot ng magkabilang panig.
Ayon kay Rosal, kitang-kita na hindi na ito sa merit ng mga dokumentong kanyang isinumite, kundi dahil na ito sa political affiliations.
Sinabi pa nito, nagkamali man sa pagsulat sa PDS ang kanyang pinagkakatiwalaang staff at nai-submit ito nang hindi gaano na-review habang siya ay nagbabakasyon, hindi umano ito dapat maging dahilan para i-deny ang kanyang aplikasyon bilang administrator.
Dagdag pa niya, maaari namang mag-resubmit ng applikasyon ngunit magdedepende pa rin ito sa Gobernador at pag-uusapan pa ito sa pagbalik ng kanyang kapatid.
