Nangapodan an kapitan kan Barangay Anislag, Daraga na magkoordinar na sainda an nang hit-and-run sa sarong lola sa lugar.
Ini an base sa intrevista kan Brigada News FM Legazpi kay Kapitan, Jay-Ar, kun sain saiyang pigheras na dapat ugwa ini nin pagmakaherak asin gibuhon an pananagutan nya sa biktima orog na ta ini an nagkakayod para sa pangurualdaw na pangkunsumo.
Kasunod kaini, pig-asigurar man niya dae sinda mapundo sa paggibo nin lakdang nganing aramon kun sisay asin kung anong klase nin motor an imbwelto huli ta medyo malabo an kuha kan CCTV orog na ta madiklom pa kan nangyari an insidente.
Mientrastanto, kan masuysoy man nin brigada News FM Legazpi an harong kan biktima, nabisto ining si Meriam Vibar 65-anyos, kun sain pig-isturya niya na nangyari an insidente alas singko nin aga, kan sya nagbabalyo sa pedestrian lane ngani kuta nang magsaod mantang dae lamang ini pigmangno kan nakabunggo saiya.
Isturya kaini na kan siya magpa x-ray sa hospital, napagaraman na may bari ini sa kamot dugang niya ugwa man siya ki sinapar na gasgas sa likod asin lugad sa bitis.
Sa ngunyan, nagpagirumdom na sana an barangay na pirming magingat sa pagmaneho huli ta buhay digdi an nakasalalay asin pirmi magin alerto nganing makalikay sa disgrasya.
Screen grabbed from: Avie Nasol
