Inaasahang makatutulong sa pagpapalago ng turismo sa lalawigan ng Albay ang planong paglalagay ng karagdagang mga aktibidad sa muling pagbubukas ng Ligñon Hill Nature Park sa Legazpi City.
Kung matatandaan, patuloy na pinag-aaralan ng Pamahalaang Panlalawigan ng Albay ang planong rehabilitasyon sa nasabing parke, kung saan isa sa mga napag-usapan ay ang paglalagay ng viewing room at deck sa taas nito, upang magsilbing dagdag na atraksyon sa nasabing Lungsod.
Sa panayam naman ng Brigada News FM Legazpi kay 2nd District Board Member Committee Chair on Tourism and on Appropriations, Atty. Melissa Abadeza-Armedilla, sinabi nitong maliban sa viewing deck, tinitingnan rin nila ang posibilidad ng paglalagay ng iba pang aktibidad sa parke, dahil kung babalik rin umano, noon ay mayroon nang Zipline activity sa lugar.
Sinabi ng opisyal mas maganda umanong pag-akyat ng mga turista ay mayroong mga aktibidad na naghihintay sa mga ito sa nasabing parke.
Dagdag pa rito, magiging 'subject to discussion' umano ang naturang plano sa opisina ng Gobernador ng Albay at sa Tourism Office upang mas lalo itong mapag-usapan.
Photo courtesy: Albay PIO
