Lalong umugong ang usap-usapan tungkol sa umano’y naudlot na kasal nina Bea Alonzo at businessman na si Vincent Co matapos mag-viral ang cryptic Facebook post ni Atty. Wilfredo Garrido tungkol sa isang “bride-to-be” na di umano’y tumangging pumirma sa revised prenuptial agreement.
Bagama’t walang direktang binanggit na pangalan ang abogado, marami ang naghinalang sina Bea at Vincent ang tinutukoy dahil sa mga lumalabas na balitang hindi na umano matutuloy ang kanilang planong kasal sa Spain ngayong Mayo.
Sa isang post, ibinahagi ni Garrido ang umano’y ilang probisyon sa prenup na naging dahilan ng pagtanggi ng bride-to-be.
Kabilang dito ang pagbabawal umano na magtaas ng boses kapag may pagtatalo, obligasyong tumira kasama ang pamilya ng lalaki, at ang umano’y pagbibigay ng custody ng mga anak sa pamilya ng groom sakaling mauwi sa hiwalayan ang pagsasama.
Ayon sa abogado, lumalabas na hindi na lamang ito usapin ng ari-arian kundi tila kontrol na rin sa personal na buhay ng babae.
Sinabi ni Garrido na handa na sanang lumagda ang bride-to-be sa prenup ngunit nadagdagan umano ito ng mga probisyong wala nang kinalaman sa property relations.
Para sa kanya, may karapatan umano itong tumanggi dahil mistulang “life sentence” na umano ang dating ng kasunduan.
Binatikos din niya ang umano’y kondisyon na kailangang tumira ang bride kasama ang magiging biyenan nito.
Ayon sa abogado, hindi raw makatarungan ang ganoong setup at tila labis na pakikialam sa buhay may-asawa.
Direkta rin niyang hinikayat ang bride-to-be na huwag nang ituloy ang kasal dahil hindi umano nakakabawas sa pagkatao ng babae ang paglayo sa isang relasyong maaari lamang magdulot ng habambuhay na paghihirap.
Dahil dito, nahati ang opinyon ng netizens at may ilang ang nagsabing sobra umano ang ilang kondisyon sa prenup, lalo na ang usapin tungkol sa custody ng mga bata, habang may iba namang naniniwalang normal lamang ito sa mayayaman at high-profile na pamilya bilang paraan ng pagprotekta sa kanilang ari-arian at interes.
Sa kabila nito, ilang mga larawan naman ng pamilya ni Bea Alonzo na nasa airport ang uploaded sa social media kaya ilang mga netizens ang naniniwala na tuloy pa rin ang kasal sa kabila ng mga haka-haka.
