Napaiyak ang isang umano'y magnanakaw sa Bangladesh matapos makaramdam ng labis na pagod at sakit ng mga katawan dahil sa matinding workout.
Sa halip kasi na sa selda ang punta ng kawatan sa gym ang bagsak niya.
Napasabak siya sa isang hard core o full body workout.
Pinagbuhat lamang siya ng barbell, pinag push-ups, pinag squats at hindi rin pinapatigil kahit pagod na.
Umabot pa nga sa punto na pagod na ang kawatan pero dedma lang ang nagpaparusa.
Ayon sa Bangladesh Guardian, umalis si Abdullah Al Mamun, may-ari ng naturang gym upang dumalo sa panalangin ng Jummah.
Pagbalik niya, nadiskubreng pinasok ang gym at nawawala ang mga baterya, kable, at ilang kagamitan.
Sa CCTV footage, isang binatang lalaki ang natukoy bilang suspek.
Makalipas ang ilang araw nang makita ni Mamun ang suspek sa isang super market, dinala niya ito sa kanyang gym at imbes na isuko sa prisinto ang kawatan, pinarusahan na lang siya ng pangmalakasang exercise.
