Arestado na ng pulisya ang lalaking nakilala sa social media bilang “Boy Palakol” matapos makita sa isang viral video na may hawak na palakol habang hinahabol ang isa pang indibidwal sa Antipolo City.
Ayon sa Antipolo police, nahuli ang suspek sa follow-up operation isang araw matapos kumalat social media ang video ng insidente na naganap sa Barangay Bagong Nayon noong June 6.
Lumabas sa imbestigasyon na nagsimula ang kaguluhan matapos umanong mambato ang isang grupo ng mga menor de edad sa ilang bahay at establisimyento sa lugar, dahilan upang maglabasan ang ilang residente at habulin ang mga sangkot.
Kasalukuyang nasa kustodiya ng pulisya ang suspek habang inihahanda ang mga kaukulang kaso laban sa kanya.
Patuloy pa ang imbestigasyon upang matukoy ang iba pang mga taong posibleng may kinalaman sa insidente.
Paalala naman ng awtoridad sa publiko na agad iulat sa pulisya ang anumang krimen o kaguluhan sa lugar.
