Isang Korean national ang natagpuang patay sa loob ng kanyang apartment sa Brgy. San Vicente II, Silang, Cavite.
Kinilala ng Police Regional Office 4A ang biktima bilang si Seong Jun Baek, 67 taong gulang, na naninirahan sa isang apartment compound sa naturang lugar.
Ayon sa paunang imbestigasyon ng Silang Municipal Police Station, hindi nakadalo si Baek sa isang nakatakdang laro sa isang golf club, kaya't nagdesisyon ang kanyang personal golf aide na puntahan siya sa kanyang tirahan upang kumustahin.
Pagdating sa apartment, natagpuan ng aide na nakalock ang pinto at walang anumang sagot mula sa loob.
Dahil dito, humingi siya ng tulong sa may-ari ng apartment at pagbukas ng pinto, tumambad sa kanila ang walang buhay na katawan ni Baek sa loob ng kanyang silid.
Ayon sa ulat ng pulisya, natural causes ang posibleng dahilan ng pagkamatay ng Korean national.
Napag-alaman din na kamakailan lamang ay sumailalim si Baek sa operasyon sa ulo, ayon sa kanyang aide.
Patuloy pang inaalam ng mga awtoridad ang iba pang detalye kaugnay ng insidente.
