Patuloy ang pagluluksa ng Ateneo de Manila University sa pagkamatay ng mga student athletes nito na sina Rene Clert Baterbonia at si Divine Adili.
Sa panibagong pahayag nito, sinabi ng unibersidad na mula nang mangyari ang insidente, nakikipag-ugnayan sila sa pamilya ng mga atleta upang makapagbigay ng tulong at suporta.
Kahapon, June 9, ng umaga, nai-transfer na ang labi ni Rene at Divine mula sa Aurora Memorial Hospital papuntang Arlington Memorial Chapels and Crematory sa Quezon City.
Bilang hiling din umano ng ina ni Rene, isasailalim sa otopsiya ang katawan nito.
Tiniyak naman ng paaralan ang pakikipag-ugnayan sa mga otoridad kasama ang National Bureau of Investigation (NBI), at Criminal Investigation and Detection Group (CIDG) sa prosesong ito sa pamamagitan ng Arlington.
Samantala, hiniling naman ng pamilya ni Divine na maiuwi sa Nigeria ang labi nito.
Inanunsyo pa ng Ateneo na bumalik kahapon mula sa Aurora ang mga miyembro ng basketball team, kasama ang coaching staff, at nag-participate sa psychological processing at counseling sessions ng College Guidance Office.
Batid umano ng Ateneo na ang emotional impact ng insidente ay higit pa sa isang session, kaya committed itong magbigay ng patuloy na counseling, psychosocial support, at iba pang klase ng assistance para sa mga student-athletes, coaches, at staff.
