Naihatid na sa kanyang pamilya sa Dipolog City ang mga labi ng overseas Filipino worker (OFW) na si Honeylith Zamoras na nasawi sa Lebanon.
Personal na sinamahan ni Department of Migrant Workers (DMW) Secretary Hans Leo Cacdac ang pagdating ng mga labi at nakiramay sa mga naulilang kaanak.
Humingi ng paumanhin ang kalihim sa pamilya kaugnay ng naunang insidente ng pagkakapalit ng mga labi ng mga nasawing OFW mula Lebanon at tiniyak na hindi sila pababayaan ng pamahalaan.
Nagbigay naman ang DMW ng tulong pinansyal at iba pang assistance para sa pamilya habang isinasagawa ang mga kinakailangang proseso hanggang sa mailibing nang maayos ang biktima.
Samantala, tiniyak ng ahensya na pananagutin ang sinumang mapatutunayang responsable sa pagkakapalit ng mga labi at patuloy na tututukan ang kaso upang makamit ang hustisya para sa mga apektadong OFW at kanilang mga pamilya.
