Inaresto ng mga awtoridad ang isang lalaki matapos nitong tangayin ang isang mamahaling road bike na nagkakahalaga ng halos P317,000 sa Barangay Pasadena, San Juan City nitong Linggo.
Ayon sa pulisya, iniwan muna ng biktima ang kanyang bisikleta sa labas ng isang coffee shop nang nakandado ito.
Ngunit sinamantala umano ng suspek ang pagkakataon at tinangay ang bisikleta.
Agad namang napansin ng isang empleyado ng establisimyento ang insidente at hinabol ang suspek.
Tumulong din ang ilang concerned citizens na harangin ito hanggang sa dumating ang mga pulis mula sa Pasadena Police Sub-Station.
Positibong kinilala ng biktima at mga saksi ang suspek kaya agad itong inaresto. Nabawi rin ng mga awtoridad ang ninakaw na bisikleta.
Nahaharap ngayon ang suspek sa kasong theft at kasalukuyang nasa kustodiya ng pulisya.
