Arestado sa entrapment operation ng PNP Anti-Cybercrime Group ang isang lalaking nag-aalok ng DIY dental braces sa social media.
Nangyari ang entrapment operation sa loob ng isang apartment sa Malvar, Batangas.
Nakipagkita ang suspek sa isang poseur patient para sa pag-install ng braces sa halagang P1,800 at doon inaresto.
Ayon kay ACG Director Brig. Gen. Wilson Asueta, matagal na umanong nagpapatakbo ng ganitong serbisyo ang suspek
Napag-alamang walang professional background sa dentistry at hindi rehistrado sa Philippine Dental Association.
Lumalabas din sa imbestigasyon na natutunan ng suspek ang pag-install ng braces sa pamamagitan lamang ng DIY tutorial sa social media.
Nahaharap na ito sa kasong paglabag sa RA 9484 o Philippine Dental Act of 2007 in relation to RA 10175 o Cybercrime Prevention Act of 2012.
Babala ng ACG, huwag magpa-ayos ng ngipin sa mga hindi rehistradong dentista dahil ito ay delikado sa kalusugan, may kakulangan sa tamang hygiene at maaaring magdulot ng seryosong komplikasyon.
