Isang 25-anyos na lalaki ang namatay habang isa pang biktima ang sugatan sa magkasunod na pamamaril sa Rodriguez, Rizal.
Ayon sa pulisya, habang kumakain ang biktima sa isang karinderya sa Barangay San Isidro, bigla na lang siyang pinaputukan ng dalawang lalaki na sakay ng motorsiklo.
Namatay ang biktima matapos tamaan ng mga bala sa iba't ibang bahagi ng katawan.
Wala umanong CCTV sa lugar, pero natukoy ng mga saksi ang isa sa mga suspek.
Pinaniniwalaan ng mga awtoridad na may kinalaman sa droga ang motibo ng krimen.
Kasunod nito, isang insidente ng pamamaril ang naganap sa Kasiglahan Village, Barangay San Jose, kung saan isang 22-anyos na lalaki ang sugatan matapos barilin ng kanyang kapitbahay dahil sa hindi pagkakaunawaan.
Patuloy ang imbestigasyon at operasyon laban sa mga suspek sa parehong insidente.
