Arestado ang isang lalaki matapos mang-snatch ng kwintas sa isang estudyanteng naglalakad sa Mandaluyong City, sa isinagawang hot pursuit operation ng mga pulis.
Ayon sa Mandaluyong City Police Station, naglalakad sa Sheridan Street, Barangay Highway Hills ang isang 23-anyos na graduating college student nang biglang hablutin ng suspek ang suot nitong gintong kwintas na nagkakahalaga ng humigit-kumulang ₱30,000.
Agad na hinabol ng biktima ang suspek at nagawang mabawi ang alahas sa maikling habulan, ngunit nakatakas pa rin ang salarin sakay ng motorsiklo.
Sa tulong ng isang security guard na nakasaksi sa insidente, agad na rumesponde ang mga tauhan ng Sub-Station 3 ng Mandaluyong CPS at nagsagawa ng hot pursuit operation na humantong sa pagkakaaresto sa suspek sa Shaw Boulevard, Barangay Pineda, Pasig City nitong June 11.
Narekober sa operasyon ang motorsiklong ginamit sa insidente at ang kwintas na tinangay, na ngayon ay hawak bilang ebidensya ng pulisya.
Kasalukuyang nasa kustodiya ng mga awtoridad ang suspek at mahaharap sa kaukulang kasong robbery snatching sa Mandaluyong City Prosecutor’s Office.
