Matapos ang halos isang taon ng pagtatago, naaresto na ang suspek pumatay sa isang 68-anyos na babae sa Candaba, Pampanga.
Kinilala itong si Jerome Santiago, alyas "Randy," na dinakip ng Pampanga SWAT Team sa isang gusali sa San Fernando.
Ayon kay Pampanga Provincial Police Office Director Col. Jay Dimaandal, matagal nang nagtatago ang suspek at ilang beses nang lumipat ng lugar, kabilang sa Batangas at Laguna.
Matatandaang natagpuang patay si Lavinia Gulapa sa loob ng kanyang opisina sa isang warehouse sa Barangay Barangka noong nakaraang taon.
Base sa autopsy, may mga pasa sa katawan ng biktima at sinaksak siya sa dibdib gamit ang limang-pulgadang karayom.
Natangay rin ng suspek ang halagang P60,000 mula sa biktima matapos ang krimen.
Ayon sa pamilya ni Gulapa, nagalit umano ang suspek matapos siyang tanggihan ng biktima nang humingi ito ng paunang sahod.
