Hinimok ni Batangas Representative Leandro Legarda Leviste ang Kamara na muling ipagpatuloy ang imbestigasyon sa flood control scandal.
Kasabay ng idinaraos na rally ng Iglesia ni Cristo sa EDSA ngayong araw, sinabi ni Leviste na tila nakalimutan na ang imbestigasyon sa usapin mula nang suspendihin at iba na ang tinutukan.
Hindi aniya naging sapat ang resulta ng trabaho ng Independent Commission for Infrastructure o ICI kaya patuloy ang kilos-protesta ng taumbayan.
Sa House Resolution 1169, binigyang-diin ni Leviste na walang “logical conclusion” sa mga dokumento na nagmula kay dating DPWH Undersecretary Catalina Cabral at Roberto Bernardo.
Punto nito, kung nais ng mga kongresista ng closure sa isyu ay marapat ikasa na muli ang pagdinig lalo’t ilan sa mga miyembro ng Kamara ay pinangalanang sangkot partikular ng labingwalong dating bodyguards ni dating Congressman Elizaldy Co.
Samantala, idinepensa naman ni Leviste ang rally ngayong araw na nagdulot ng mabigat na trapiko sa EDSA at iginiit na minsan lang naman ito.
Hindi umano ito laban lang ng iisang grupo kundi laban para sa korapsyon.
