Naisailalim na sa inquest proceedings ang lider ng tinaguriang ‘Termite Gang’ at tatlo nitong kasamahan matapos maaresto at iugnay sa limang insidente ng pagnanakaw sa Central Luzon at Isabela.
Sa panayam sa Camp Crame, sinabi ni PRO-3 Regional Director BGen. Jess Mendez na may outstanding warrant sa kasong frustrated murder at robbery ang lider ng grupo, habang nahaharap naman ang 3 sa mga kasong robbery at illegal possession of firearms.
Kabilang sa mga insidente ang pagnanakaw sa isang bangko sa Palayan City, Nueva Ecija noong March 22, robbery sa Bamban, Tarlac, at tatlong convenience store sa Isabela.
Ayon kay Mendez, dating bumubutas sa ilalim ng mga establisyimento ang grupo para makapasok sa mga bangko, pero nag-divert umano sa convenience stores dahil mas mabilis mapasok at makuha ang vault.
Natunton ang mga suspek sa pamamagitan ng CCTV backtracking at forward tracking, hanggang matukoy ang kanilang sasakyan at mapuntahan ang pinagtataguan sa Porac at Mabalacat, Pampanga.
Dalawa pa ang pinaghahanap na umano'y miyembro ng grupo.
Inaalam din kung sangkot ang mga ito sa mga pawnshop robbery sa Quezon City at Pasay.
