Ipinag-utos ng Land Transportation Office (LTO) ang paghahain ng Show Cause Order laban sa drayber at rehistradong may-ari ng isang utility vehicle na sangkot sa hit-and-run na ikinasawi ng isang matandang pedestrian sa Calamba City, Laguna.
Batay sa imbestigasyon ng LTO, natukoy ang pagkakakilanlan ng drayber at may-ari ng sasakyan na nakabangga sa biktima noong Hulyo 7 sa Barangay Makiling, Calamba.
Makikita sa kumalat na video na mabilis ang takbo ng sasakyan nang mabangga nito ang matandang tumatawid sa kalsada.
Inaatasan ang drayber na magsumite ng paliwanag kaugnay ng posibleng paglabag sa reckless driving.
Bukod dito, iniutos din ng ahensya ang pagsuko ng lisensya nito at isinailalim sa 90 days preventive suspension habang nagpapatuloy ang imbestigasyon.
Inilagay rin sa alarm status ang utility vehicle upang hindi ito makapagsagawa ng anumang transaksyon sa LTO hanggang sa maresolba ang kaso.
Tiniyak naman ng ahensya na mananagot ang sinumang mapapatunayang lumabag sa batas trapiko.
