Agad na inisyuhan ng Show Cause Order (SCO) ng Land Transportation Office (LTO) ang isang traffic enforcer ng isang local government unit matapos itong makuhanan ng video habang minamaneho umano ang isang impounded na motorsiklo nang walang suot na helmet.
Inatasan ang traffic enforcer na humarap sa tanggapan ng LTO upang magpaliwanag sa umano'y paglabag sa batas na nag-uutos ng pagsusuot ng helmet sa pagmamaneho ng motorsiklo.
Kasabay nito, isinailalim din sa 90-araw na preventive suspension ang driver's license nito habang nagpapatuloy ang imbestigasyon sa insidente na kumalat sa social media.
Ayon sa LTO, dapat magsilbing huwaran sa pagsunod sa batas-trapiko ang mga traffic enforcer dahil sila mismo ang mga nagpapatupad nito sa lansangan.
Patuloy naman ang imbestigasyon ng ahensya upang matukoy kung may iba pang paglabag na maaaring isampa laban sa nasabing traffic enforcer.
