Inamin ng Filipino-American actress na si Liza Soberano na nasaktan siya noon sa mga puna at komento ng ilang netizens na nagsasabing “laos” na siya matapos niyang piliing magtuloy ng karera sa Hollywood.
Sa isang panayam, ibinahagi ni Liza na naging mahirap para sa kanya ang pagsisimula muli sa US, lalo na nang makita ng publiko na tumatanggap siya ng maliliit na proyekto at influencer engagements.
Ayon sa aktres, hindi na kasinglaki ng dati ang kanyang kinikita at karamihan pa rin ng kanyang income ay nagmumula sa Asia, habang nakabase naman siya sa Amerika kung saan mas mataas ang gastusin sa pamumuhay.
Dahil dito, sinabi niyang kailangan niyang tanggapin ang iba't ibang trabaho upang matustusan ang kanyang mga pang-araw-araw na pangangailangan.
Inamin din ni Liza na noong una ay labis siyang naaapektuhan ng mga negatibong komento tungkol sa kanyang karera, ngunit kalaunan ay natutunan niyang tanggapin ang mga sakripisyong kaakibat ng pagsisimula muli sa isang mas malaking industriya.
Aniya, bahagi rin ng kanyang pinagkakagastusan ang patuloy na pagsasanay sa pag-arte at pagpapahusay ng kanyang kakayahan, kabilang ang pagkuha ng acting at vocal coaches para sa kanyang mga audition sa Hollywood.
Matatandaang noong 2023 ay inanunsyo ni Liza ang paglipat niya ng career management at ang pagtutok sa pagbuo ng international career.
Kasunod nito, umani siya ng iba't ibang reaksyon mula sa publiko, kabilang ang mga nagsabing humina na ang kanyang kasikatan sa Pilipinas matapos mabawasan ang kanyang mga lokal na proyekto.
Sa kabila ng mga puna, patuloy namang lumalawak ang kanyang international portfolio. Nagkaroon siya ng Hollywood debut sa pelikulang “Lisa Frankenstein” at kabilang din siya sa mga voice actor sa isang animated film.
