Pinagpapaliwanag ng Land Transportation Office (LTO) ang rehistradong may-ari at driver ng isang Isuzu MU-X matapos mahuling gumawa ng illegal U-turn sa North Luzon Expressway (NLEX).
Ayon kay LTO Chief Assistant Secretary Markus V. Lacanilao, naglabas na ang ahensya ng show cause order laban sa sangkot na motorista hinggil sa naturang paglabag.
Batay sa isinagawang beripikasyon ng LTO, ang naturang sasakyan ay hindi sumunod sa solid white line marking sa expressway at nagsagawa ng illegal U-turn.
Napag-alaman na nakarehistro ang Isuzu MU-X sa ilalim ng pangalan ng isang kumpanya.
Sa inilabas na show cause order, inatasan ang rehistradong may-ari at ang driver na humarap sa tanggapan ng Intelligence and Investigation Division at magsumite ng sinumpaang salaysay kaugnay ng insidente.
Kabilang sa mga posibleng paglabag na kinahaharap ng driver ay Reckless Driving at Disregarding Traffic Signs. Pinagpapaliwanag din ito kung bakit hindi dapat suspendihin o bawiin ang kanyang lisensya kaugnay ng kasong Improper Person to Operate a Motor Vehicle.
Habang nagpapatuloy ang imbestigasyon, inilagay sa alarm status ang naturang sasakyan.
Sinuspinde rin ng LTO sa loob ng 90 araw ang lisensya ng driver na gumagamit ng sasakyan sa oras ng insidente at inatasang agad itong isuko sa ahensya.
