Pinatawan ng Land Transportation Office (LTO) ng 90-araw na preventive suspension ang lisensya ng isang rider na sangkot sa viral road rage incident na kumalat sa social media.
Ayon sa LTO, pinadalhan na rin ng Show Cause Order (SCO) ang rider upang magpaliwanag sa kanyang naging asal sa kalsada matapos makuhanan ng video ang pakikipagtalo nito sa kapwa motorista.
Kasabay nito, inilagay din sa alarm status ang motorsiklong sangkot habang nagpapatuloy ang imbestigasyon ng ahensya.
Iginiit ni LTO Chief Assistant Secretary Markus Lacanilao na pananagutin ang mga motorista na nagpapakita ng iresponsableng pag-uugali sa lansangan upang mapanatili ang kaligtasan at kaayusan sa kalsada.
Patuloy namang hinihikayat ng LTO ang publiko na iulat ang mga paglabag sa batas trapiko at mga insidente ng road rage upang agad na maaksyunan ng ahensya.
