Posibleng lumakas bilang super typhoon ang bagyo bago pa man ito pumasok sa Philippine area of responsibility (PAR) sa susunod na linggo.
Sa panayam ng Brigada NewsFM Manila kay DOST-PAGASA Weather Specialist John Manalo, sinabi nitong kasalukuyan nang nasa typhoon category ang weather system na may international name na "Bavi."
Inaasahang papasok ito sa PAR sa Miyerkules at tatawagin na itong Bagyong Inday.
Bagama't mababa ang posibilidad na mag-landfall sa bansa, inaasahang babaybayin nito ang hilagang-silangang bahagi ng PAR.
Posible nitong palakasin ang Habagat na magdadala ng mga pag-ulan, partikular sa kanlurang bahagi ng Luzon kabilang ang Metro Manila, sa Huwebes at Biyernes.
Ayon pa sa PAGASA, maaaring magtaas ng Tropical Cyclone Wind Signal No. 2 pagsapit ng Miyerkules, na posibleng umabot sa Signal No. 3 o 4 sa ilang bahagi ng Extreme Northern Luzon depende sa magiging galaw at lakas ng bagyo.
Ipinaliwanag din ng ahensya na malakas na ang bagyo habang nasa karagatan pa kaya inaasahang mapapanatili nito ang lakas at maaabot ang super typhoon category bago pumasok sa PAR.#BrigadaNews
