Kinumpirma ng PHIVOLCS na ang naitalang magnitude 7.8 na lindol na yumanig sa Mindanao ay dulot ng paggalaw ng Cotabato Trench.
Sa panayam ng Brigada NewsFM Manila kay PHIVOLCS Director Teresito Bacolcol, sinabi nitong ito ang kaparehong fault system na nagdulot ng mapaminsalang lindol at tsunami noong Agosto 17, 1976.
Naitala ang epicenter 32 kilometro timog-kanluran ng Maasim, Sarangani sa lalim na 33 kilometro.
Naglabas na ang PHIVOLCS ng tsunami warning at pinayuhan ang mga residente sa mga baybaying lugar ng Sarangani, Davao Occidental, Tawi-Tawi, Sulu, Basilan, Zamboanga del Sur, Zamboanga Sibugay, Sultan Kudarat, at South Cotabato na agad lumikas sa mas mataas na lugar o mas malayo sa dalampasigan.
Dagdag pa ng ahensya, posibleng makaranas ng mga alon na mahigit isang metro ang taas kaysa normal na antas ng tubig at maaaring magdulot ng pinsala sa mga kabahayan at taong nasa baybayin.
Sa ngayon, patuloy pa rin ang pagbabantay ng mga awtoridad.
