Nanawagan ang ina ni Yancee Separa na si Jenelyn Badoria sa gobyerno na ibaba ang age of criminal liability matapos ang naging Tacloban shooting incident na naging dahilan ng pagkamatay ng kanyang anak.
Ayon kay Badoria, sang-ayon siya sa nauna nang mungkahi ni Senador Raffy Tulfo na magkaroon ng pasilidad na nararapat para sa mga bata na mapapatunayang gumawa ng kahindik-hindik na krimen.
Anya, dapat lang itong kaharapin ng mga ito upang maramdaman din nila ang sakit at parusa na karapatdapat sa kanilang ginawa.
Pero maliban sa mag-asawang sina Badoria at Jamie Separa ay humarap din sa pagdinig ang ilan pang kamag-anak ng nabiktima katulad na lang nina Janica Mae Bituin at Rolando Lapidario.
Katulad ng sinabi ni Badoria, umaasa rin si Lapidario na mapapababa ang age of criminal liability upang hindi na pamarisan pa ng ibang menor de edad ang aksyong ito.
Samantala, umapela naman si Bituin na tigilan na ang pagko-content ng ilan sa kanyang kapatid at pagpapakalat ng impormasyong kabilang ito sa mga namatay na estudyante kahit hindi naman.
Sa latest update na ibinigay ni Bituin para sa kanyang kapatid na natamaan ng bala kamakailan, dumaan na raw sa operasyon ang kanyang kapatid bagamat hindi pa nila alam kung kailan ito tuluyang makakalabas.
