Mahigit 1,500 tauhan ng Philippine National Police ang pinatawan ng iba’t-ibang parusa bilang bahagi ng pinaigting na kampanya ng organisasyon laban sa mga tiwaling miyembro nito.
Batay sa datos ng PNP, umabot sa 1,501 personnel ang nasampahan ng kaukulang disciplinary action mula January 1 hanggang June 3, 2026.
Kabilang sa mga ipinataw na parusa ang 436 dismissals from service, 77 demotions, 692 suspensions at iba pang administrative sanctions.
Ayon kay PNP Chief Police General Jose Melencio Nartatez Jr., layunin ng kampanya na tiyaking agad na naaaksyunan ang mga kaso, at mapanatili ang disiplina at pananagutan sa hanay ng pulisya.
Tiniyak din ng PNP na sa kabila ng mahigpit na pagpapatupad ng mga parusa, patuloy nitong igagalang ang due process at patas na pagdinig sa lahat ng kasong administratibo.
