Ayon sa isang pag-aaral mula sa Philippine Statistics Authority, naitala ang 3,343 na mga bata na ipinanganak ng mga ina na may edad 10-14 taong gulang noong 2023.
Mula sa 2,113 na ipinanganak noong 2020, tumaas ang bilang sa 2,320 noong 2021 at 3,135 noong 2022.
Ang datos na ito ay nagbigay-diin sa patuloy na pagtaas ng bilang ng mga batang ina.
Dahil dito, nanawagan ang Child Rights Network at mga child rights advocates kay Pangulong Ferdinand Marcos Jr. at sa mga senador na masusing suriin ang Senate Bill 1979 o ang Adolescent Pregnancy Prevention Bill, na layong tugunan ang problemang ito sa pamamagitan ng mga polisiya at programa.
Ayon kay Au Quilala, deputy executive director ng Philippine Legislators Committee on Population and Development at convenor ng CRN, mahalaga ang pagpapalaganap ng tamang edukasyon ukol sa reproductive health at sex education.
Dapat, aniya, ay ituro ito ng mga propesyonal upang mabigyan ng tamang impormasyon ang mga kabataan, at hindi umaasa sa maling impormasyon mula sa internet at kanilang mga kaibigan.
Ipinakita rin sa pag-aaral ng PSA na 44% ng mga batang kababaihan at 39% ng mga batang kalalakihan sa Pilipinas ay kulang sa tamang impormasyon tungkol sa sex at madalas ay nagre-rely sa mga maling source tulad ng social media.
Ang maagang pagbubuntis ay nagiging sanhi ng halos 60% ng mga drop-out na batang babae sa paaralan, na nagiging sanhi ng malubhang epekto sa kanilang kinabukasan at nagkakaroon ng malaking epekto sa ekonomiya ng bansa.
Nanawagan ang mga eksperto at mga child rights advocates ng mas malawak na aksyon upang masugpo ang maagang pagbubuntis at mabigyan ng pagkakataon ang mga kabataan na magkaroon ng mas maliwanag na hinaharap.
