Nakatakdang magsagawa ng malawakang job fair ang Department of Labor and Employment (DOLE), bilang bahagi ng pagdiriwang ng ika-128 Araw ng Kalayaan sa June 12.
Ayon sa DOLE, gaganapin ang aktibidad sa mga strategic locations na makikita sa website o social media pages ng ahensya, kung saan inaasahang lalahukan ito ng mahigit 1,100 local at overseas employers na magbibigay ng kabuuang 95,240 job vacancies.
Kabilang sa mga pangunahing in-demand na trabaho ang sales clerks, store crew, production operators, construction workers, call center representatives, at service crew.
Bukod sa job fair, magkakaroon din ng one-stop-shop services kung saan makikiisa ang iba't ibang ahensya ng pamahalaan tulad ng National Bureau of Investigation, Social Security System, Philippine Health Insurance Corporation, at Home Development Mutual Fund.
Makikibahagi rin ang Technical Education and Skills Development Authority, Department of Information and Communications Technology, at Civil Service Commission sa pagbibigay ng skills training, micro-credential programs, at iba pang serbisyong makatutulong sa mga aplikante na naghahanap ng trabaho.
