Mariing itinatanggi ng kampo nina Maine Mendoza at Arjo Atayde ang mga kumakalat na balitang hiwalay na ang mag-asawa.
Ang paglilinaw ay ginawa, matapos maging usap-usapan sa social media ang kawalan ng aktres sa isang mahalagang okasyon ng pamilya Atayde.
Nagsimula ang espekulasyon nang mapansin ng mga netizen ang TikTok video ni Bayani Agbayani na ngayon ay deleted na kung saan ipinagdiriwang ang double birthday celebration ng ama ni Arjo na si Art Atayde at kapatid na si Ria Atayde.
Sa video, makikitang kumpleto ang pamilya kasama sina Sylvia Sanchez, Zanjoe Marudo, at anak nila ni Ria, ngunit kapansin-pansing wala si Maine.
Ayon sa opisyal na kinatawan ng pamilya Atayde, walang katotohanan ang mga hinala ng netizens. Ipinaliwanag din nito na hindi nakasipot si Maine dahil masama ang pakiramdam nito.
Matatandaang nitong Pebrero lamang ay nagbahagi pa si Maine ng mga sweet photos nila ni Arjo habang dumadalo sa mga kasal, kabilang ang renewal of vows nina Vic Sotto at Pauleen Luna.
Nanatili ring matatag si Maine sa pagsuporta sa asawa sa gitna ng mga batikos na kinaharap ni Arjo kamakailan kaugnay ng isyu sa flood control projects.
Ikinasal sina Maine at Arjo sa isang pribadong seremonya sa Baguio City noong 2023 at nananatiling pribado ngunit matatag ang kanilang pagsasama sa kabila ng mga intriga.
