Handa ang Malacañang na suportahan ang imbestigasyon laban sa sinumang opisyal ng gobyerno na masasangkot sa katiwalian, basta may lehitimong ebidensya laban sa mga ito.
Ito ang pahayag ni Palace Press Officer Claire Castro matapos tanungin kung susuportahan ng Palasyo ang posibleng imbestigasyon sa alegasyon ni Senador Panfilo Lacson na may bilyun-bilyong pisong infrastructure projects na ipinasok umano ni Senador Alan Peter Cayetano sa 2025 national budget.
Ayon kay Castro, malinaw ang direktiba ni Pangulong Ferdinand Marcos Jr. na papanagutin ang sinuman, kaibigan man, kamag-anak, kaalyado o hindi kung mapatutunayang may paglabag sa batas.
Iginiit ng opisyal na dapat nakabatay sa lehitimong ebidensya ang anumang reklamo at hindi sa mga gawa-gawang kwento, intriga o planted evidence.
Dagdag pa nya, kung may sapat na ebidensya ay dapat itong ilahad at sampahan ng kaukulang kaso ang mga mapatutunayang sangkot.
