Hindi naniniwala ang Malacañang sa pahayag ni Vice President Sara Duterte na wala itong balak na mapaalis sa pwesto si Pangulong Ferdinand Marcos Jr.
Kasunod ito ng sinabi ni VP Duterte na wala syang planong agawin ang pwesto ng Pangulo at mas gusto nyang makita ng taumbayan hanggang sa huli kung gaano umano kawalang-hiya si Pangulong Marcos.
Bwelta naman dito ni Palace Press Officer Claire Castro, wag na raw magpakaplastik o magbait-baitan ang Pangalawang Pangulo, dahil ang mga kaalyado umano ni VP Sara ang nagtutulak ng destabilization.
Hindi rin umano nito maikakaila ang mga nauna nitong pahayag at posisyon laban sa Pangulo.
Partikular na binanggit ni Castro ang talumpati ni Duterte sa Netherlands noong July 2025 kung saan sinabi umano nitong nais nilang mapalayas sa pwesto si PBBM.
Samantala, inalmahan din ng Malacañang ang pagtawag ni VP Sara kay President Marcos na "walang hiya."
Ayon kay Castro, kapag wala umanong binabasang script ang Bise Presidente ay lumalabas ang tunay nitong asal.
Iginiit din nya na hindi ang Pangulong Marcos ang nararapat tawaging "walang hiya" kundi ang mga taong sangkot umano sa pagpatay, pananakot, at pagpapakalat ng fake news.
Dagdag pa nya, tila ang sariling pamilya umano ng Bise Presidente ang inilalarawan nito sa paggamit ng naturang salita.
