Nanawagan ang Malacañang sa liderato ng Iglesia ni Cristo (INC) na maging mapagmatyag laban sa mga grupong maaaring samantalahin ang kanilang isinagawang protesta upang i-destabilize ang pamahalaan.
Kasunod ito ng mga kumakalat na ulat sa social media tungkol sa umano'y planong paglusob sa ilang kampo ng militar at maging sa Malacañang.
Ayon kay Palace Press Officer Claire Castro, bagama't hindi pa kumpirmado ang naturang mga impormasyon, hindi pa rin ito isinasantabi ng mga awtoridad at patuloy na binabantayan ang sitwasyon.
Iginiit din ni Castro na hindi naniniwala ang Malacañang na layunin ng Iglesia ni Cristo na maghasik ng kaguluhan o patalsikin ang Pangulo dahil iginagalang ng pamahalaan ang integridad at liderato ng organisasyon.
Gayunman, sinabi ng Palasyo na matagal nang may mga grupong naglalayong mapaalis sa pwesto si Pangulong Ferdinand Marcos Jr., kaya nananatiling handa ang pamahalaan sa anumang banta sa seguridad.
