Iginiit ng Malacañang na walang dapat ikabahala ang sinumang masasaklaw ng imbestigasyon ng National Bureau of Investigation (NBI) sa umano'y mga iregularidad sa 2019 Southeast Asian (SEA) Games kung wala itong ginawang mali.
Ito ang tugon ni Palace Press Officer Claire Castro matapos sabihin nina Senators Alan Peter at Pia Cayetano na ginagamit umano ang planong imbestigasyon upang i-intimidate ang mga senator-judges at ilihis ang atensyon mula sa impeachment trial.
Ayon kay Castro, bahagi ng mandato ng NBI ang magsagawa ng imbestigasyon kapag may impormasyon o sumbong tungkol sa posibleng anomalya.
Anya, batay daw sa paliwanag ni NBI Director Matibag, nabuksan ang usapin matapos ang isang pagpupulong kaugnay ng planong pagtatayo ng NBI Academy sa New Clark City, kung saan may nagbanggit ng umano'y isyu ng korapsyon sa 2019 SEA Games.
Sinabi rin ni Castro na nabanggit lamang ni Matibag ang planong imbestigasyon nang tanungin sya sa isang ambush interview tungkol sa mga kasong hinahawakan ng NBI, at hindi dahil sa umano'y word war nito kay Senador Alan Cayetano.
Iginiit pa ni Castro na hindi dapat ituring na pang-i-intimidate ang isang imbestigasyon at wala umanong dahilan para mabahala ang sinumang walang namang itinatago.
