Inaasahang magkakaroon ng malaking pagtaas sa presyo ng produktong petrolyo sa susunod na linggo kasunod ng kaguluhan sa Middle East.
Sa video message ni Pangulong Ferdinand Marcos Jr., sinabi nitong apektado ang pagdaan ng mga barkong may kargang langis sa Strait of Hormuz dahil sa tensyon sa Gitnang Silangan.
Dahil dito, tinatayang madaragdagan ng ₱7.48 kada litro ang presyo ng gasolina, ₱17.28 naman sa diesel, at ₱32.35.
Kasabay nito, inilatag din ni Pangulong Marcos ang ilang hakbang na ginagawa ng pamahalaan upang mabawasan ang epekto ng pagtaas ng presyo ng langis.
Ayon sa Punong Ehekutibo nakikipag ugnayan na sila sa Kongreso para mabigyan sya ng kapangyarihan na pansamantalang bawasan ang excise tax sa petroleum products kung lalampas sa $80 per barrel ang presyo ng langis sa world market.
Pinag-aaralan din ang pag-amyenda sa Biofuels Act of 2006 upang magamit ang mas murang bioethanol na maaaring makatulong sa pagbaba ng presyo ng gasolina.
Ilalabas na rin daw ng pamahalaan sa lalong madaling panahon ang fuel subsidy at cash transfer para sa mga sektor na apektado ng oil price hike.
Samantala, ipatutupad naman sa ilang tanggapan ng gobyerno ang four-day work week, kasabay ng direktiba sa mga ahensya na magbawas ng 10 hanggang 20% sa konsumo ng kuryente at petrolyo bilang bahagi ng energy conservation measures.
