Nagpaabot ng humanitarian assistance ang Malaysia sa mga biktima na naapektuhan ng magnitude 7.8 na lindol sa Mindanao.
Ayon sa Department of Foreign Affairs (DFA), personal na ipinagkaloob ng Embahada ng Malaysia sa Department of Social Welfare and Development (DSWD) ang 1,000 kilo ng bigas para sa mga apektadong residente.
Nagbigay rin ang Australia ng mahigit P35 milyong halaga ng relief supplies sa pamamagitan ng Philippine Red Cross, United Nations Population Fund, at International Organization for Migration.
Kabilang sa ipinadalang tulong ang sleeping kits, water, sanitation and hygiene kits, shelter supplies, mother and newborn kits, at reproductive health supplies.
Samantala, nagpadala rin ang United Arab Emirates ng humanitarian team upang tumulong sa mga komunidad sa General Santos City at Glan, Sarangani kung saan namahagi ang mga ito ng food packs at malinis na inuming tubig sa mga naapektuhang residente.
Kaugnay nito, nagpasalamat naman si Foreign Affairs Secretary Ma. Theresa Lazaro sa mga bansang nagpaabot ng tulong at pakikiramay sa Pilipinas na aniya'y malaking tulong sa pagpapabilis ng relief operations at early recovery efforts para sa mga Pilipinong naapektuhan ng mapaminsalang lindol.
