Nilinaw ng Department of Justice (DOJ) na hindi minadali ng korte ang pagdedesisyon sa motion to quash sa kasong kinakaharap ni Senador Rodante Marcoleta, sa gitna ng tanong kung bakit tila mabilis ang naging aksyon ng Sandiganbayan kumpara sa ibang kaso.
Ayon kay Justice Undersecretary Nicholas Felix Ty, wala umanong “mabilis” o “mabagal” sa galaw ng korte dahil nakabatay ito sa sariling proseso at pagtaya sa ebidensya ng bawat kaso.
Dagdag pa niya, nasa hurisdiksyon na ng korte ang desisyon kaya’t hindi ito dapat ikumpara sa ibang usapin.
Sinabi kanina ni Marcoleta na nagtungo siya sa korte matapos malaman na agad na cinalendar ang motion to quash para sa kanyang kaso, na aniya’y indikasyon na umiiral ang rule of law.
Pero makalipas lang ang ilang sandali, agad itong ibinasura ng Sandiganbayan.
Samantala, nilinaw naman ng DOJ na wala itong direktang partisipasyon sa kasong plunder laban kay Senador Marcoleta dahil ang Office of the Ombudsman at ang Office of the Special Prosecutor ang pangunahing nangunguna sa naturang kaso.
Bagama’t may mandato ang ahensya magsagawa ng prosekusyon sa ilang kaso, ang papel umano ng DOJ sa ngayon ay limitado lamang sa pagbibigay ng impormasyon sa publiko upang mapataas ang kamalayan hinggil sa proseso ng hustisya.
