Nagwagi ng parangal bilang Best Actress sa pelikulang 'Sunshine' si Maris Racal sa katatapos lang na 9th Entertainment Editors’ Choice Awards o The EDDYS nitong July 5.
Nang inanunsyo na siya ang makakukuha ng paranagal, laking gulat ni Maris dahil bigatin din ang ibang kalahok para rito gaya nina Mylene Dizon, Barbie Forteza, Krystel Go, Angelica Panganiban, at Charo Santos.
Sa kanyang acceptance speech, iniugnay ng aktres ang ginampanang karakter na si 'Sunshine' sa mga hamon na naranasan niya sa kanyang karera.
Aniya, “Sunshine is a girl who had so much promise, who had big, big, dreams, who had such a bright future ahead of her, pero nadapa, nagkamali."
Pagbabahagi ni Maris, pamilyar ang role na ito sa kanya lalo pa't alam niya ang pakiramdam na mawala ang lahat.
“Sa istorya ni Sunshine pinili niya mabuhay mga pangarap niya. This award is for all the Sunshines in this world. Sa lahat ng mga kababaihan, sa karapatan natin piliin sarili natin. Sa lahat ng nadapa, bangon lang,” dagdag pa niya.
Samantala, nanalo rin ang dating nobyo ni Maris na si Rico Blanco ng Best Supporting Actor sa naturang event.
Kapansin-pansin na nakangiting pumapalakpak ang aktres nang tawagin ang pangalan ni Rico.
Nang hingan naman siya ng pahayag, sinabi niyang masaya siya para sa aktor, lalo pa't batid niyang matagal na umano nitong gustong makatanggap ng award.
