Mariing kinondena ng Commission on Human Rights (CHR) ang magkasunod na insidente ng pamamaslang sa dalawang motorcycle taxi rider sa mga lugar ng Cavite at Caloocan City.
Bunsod ng krimen, nanawagan ang ahensya sa mga awtoridad na magsagawa ng malalimang imbestigasyon upang agad na madakip ang mga salarin at maibigay ang hustisya sa mga biktima.
Puspusan na ring binabantayan ng CHR National Capital Region office ang galaw ng kapulisan upang masigurong gumugulong ang tamang proseso at naaasikaso ang mga pangangailangan ng naulilang pamilya.
Binigyang-diin ng CHR na lubhang mapanganib ang hanapbuhay ng mga rider dahil madalas silang napipilitang magsakay ng mga estranghero, bumiyahe hanggang gabi, at maghatid sa mga liblib at madidilim na lugar.
Dahil sa mga seryosong banta sa buhay ng mga manggagawang ito, iminumungkahi ng CHR sa Philippine National Police, lokal na pamahalaan, at transport operators na mas palakasin pa ang police visibility at emergency response sa kalsada.
