Nanawagan ang EcoWaste Coalition sa Food and Drug Administration (FDA) na higpitan ang regulasyon sa mga produktong pambata matapos makadiskubre ng mataas na antas ng lead sa ilang school bags at lunch bags na ibinebenta sa merkado.
Batay sa pagsusuri ng grupo, 17 sa 46 na backpack at anim sa 11 na lunch bag ang natuklasang may lead sa mga metal zipper at iba pang accessible na bahagi na madalas nahahawakan ng mga bata.
Ayon sa EcoWaste Coalition, maaaring malagay sa panganib ang kalusugan ng mga bata kapag nahawakan o naisubo nila ang mga bahagi ng gamit na may lead contamination.
Mababatid na ang lead ay isang nakalalasong kemikal na maaaring makasama sa pag-unlad ng utak at nervous system ng mga bata.
Dahil dito, hinimok ng grupo ang FDA na magpatupad ng mas mahigpit na pamantayan at paglalagay ng tamang label sa mga produktong pambata upang matiyak ang kaligtasan ng mga mamimili.
