Naaresto ang isang 49-anyos na mekaniko sa Baliwag, Bulacan matapos umanong hindi na ibalik ang sasakyang ipinagkatiwala sa kanya ng isang 67-anyos na negosyante para ipaayos.
Ayon sa Quezon City Police District (QCPD), ibinigay ng biktima ang susi ng kanyang Honda City sa suspek noong Hunyo 29 dahil dati na rin umano nitong inaayos ang kanyang mga sasakyan.
Sa halip na isauli ang kotse matapos kumpunihin, hindi na umano ito makontak ng may-ari kaya agad siyang nagsumbong sa mga awtoridad.
Sa follow-up operation, naaresto ang suspek sa Barangay Tangos, Baliwag, Bulacan, habang narekober naman ang sasakyan.
Nang inspeksiyunin ang kotse, napansin ng biktima na nawawala ang ekstrang gulong, hydraulic jack, lifting jack at iba pang mga gamit na nagkakahalaga ng humigit-kumulang 15,000.
Lumalabas din sa rekord ng pulisya na dati nang naharap ang suspek sa mga kasong murder at frustrated murder.
Kasalukuyang nakapiit ang suspek at nahaharap sa mga kasong estafa, paglabag sa New Anti-Carnapping Act of 2016, at theft.
