Hindi na rin nakaligtas maging ang mga bumbero sa fake news.
Ito ay kasunod ng kanilang pagresponde matapos makatanggap ng impormasyon at larawan ng isang di umano’y nasusunog na truck sa Parola, Maynila.
Ngunit, pagdating sa lugar ng apat na truck ng BFP ay buong-buo at hindi naman nagliliyab ang truck.
Batay sa imbestigasyon, edited umano ang isinend na picture sa group chat ng mga bumbero.
Ayon kay Recto Fire Volunteers Chief Samuel Fenix, kailangang mapanagot ang sinumang may gawa at nagpakalat ng larawan.
Mababatid na sa ilalim ng Revised Fire Code of the Philippines of 2008, maaaring pagmultahin ng hanggang ₱50,000 at maharap sa kasong unjust vexation ang sinumang magbibigay ng maling impormasyon tungkol sa sunog.
